Брегалница со дуелот против Каменица Саса на домашен терен во сабота (13. март) го стартува третиот круг од натпреварите во Вторaта лига - Исток.
По убедливата победа од 1-5 на гостувањето против Росоман, мотивот меѓу „сините“ е на ниво повисоко во желбата од натпревар на натпревар да се демонстрира нов квалитет на патот кон остварување на целите.
Капитенот Ристе Наумов против Росоман запиша хет-трик, сега издвојувајќи се на врвот од листата меѓу најдобрите стрелци во Втората лига - Исток. Наумов верува дека екипата повторно ќе одигра согласно своето реноме, и ќе дојде до посакуваните нови три бода.
„Секако задоволни сме од начинот на кој дојдовме до претходната победа. Но, тоа е зад нас, а сите мисли сега се кон натпреварот со Саса. Тимот од Македонска Каменица секогаш бил незгоден противник за нас. Добро се сеќаваме на некои претходно меѓусебни натпревари и тоа треба да е поука за сите нас. Но, јасно е дека без разлика на противникот од спротивната страна Брегалница на сите натпревари оди на победа. Така ќе биде и во сабота“ - вели Наумов.